Markab kalluumaysi oo Shiinees ah, kana mid ah maraakiib si weyn loogu tuhunsan yahay kalluumaysiga sharci-darrada ah, ayaa lagu qafaashay xeebaha Puntland ee Soomaaliya, sida ay shaacisay shirkadda la-tashiga amniga badaha ee Vanguard Tech.
Markabkan oo lagu magacaabo Liao Dong Yu 578 ayaa la sheegay in lagu qabtay meel u dhow xeebta Bandarbayla, Puntland, iyadoo lagu soo waramayo isku-duwidaha juqraafiyeed 09°09 N, 050°43 E. Sida ku xusan warbixinta hordhaca ah, kooxaha afduubka gaystay ayaa weerarka fuliyay galabnimadii hore ee maalinta koowaad ee Sannadka Cusub, xilli uu markabku ku sugnaa biyaha ku dhow xeebta.
Vanguard Tech ayaa sheegtay in laga shakisan yahay in kooxaha qafaashay ay qorsheynayaan in ay shaqaalaha markabka ku hayaan madax-furasho, inkasta oo ay xustay in warbixintan weli aan si rasmi ah loo xaqiijin. Arrintan ayaa mar kale soo jeedinaysa khataraha amni ee ka jira biyaha Soomaaliya iyo doorka maraakiibta shisheeye ee lagu eedeeyo kalluumaysiga sharci-darrada ah.
Dhacdadan ayaa sidoo kale kusoo aadaysa xilli ay Puntland iyo hay’adaha amniga badda ay dadaal dheeraad ah ugu jiraan la-dagaallanka kalluumaysiga sharci-darrada ah iyo sugidda amniga xeebaha, si loo ilaaliyo kheyraadka badda iyo nolol-maalmeedka kalluumaysatada maxalliga ah.
SomaliSwiss Media