In kasta oo ay naadir tahay in Bundesratka Switzerland uu qaabilo wakiillo ka socda dowlad-goboleedyo (regional governments), haddana waxaa si gaar ah Bern loogu soo dhaweeyay Winfried Kretschmann, oo ah wasiir-madaxweyneha gobolka Baden-Württemberg ee Jarmalka.
Kretschmann ayaa Khamiistii booqasho ku yimid magaalada Bern, halkaas oo ay si wadajir ah ugu qaabileen laba ka mid ah Bundesratka Switzerland. In masuul ka socda dowlad-goboleed Jarmal ah lagu qaabilo heer federaal ma aha arrin caadi ah.
Waxaa jira shan sababood oo muujinaya sababta Kretschmann uu u helay maqaam gaar ah:
1. Xiriir deris oo leh xaalad gaar ah
Gudaha dowladda federaalka Switzerland waxaa jira xeerar gaar ah oo nidaamiya booqashooyinka rasmiga ah ee dibadda. Mabda’a guud wuxuu yahay in Bundesratka ay martidooda kula kulmaan si siman: wasiirro ayaa la kulma wasiirro, halka madaxweynaha ama Golaha Bundesratka ay la kulmaan madax dawladeed. Booqashooyinka heer ka hooseeya, sida tan Kretschmann, caadi ahaan lama qorsheeyo, balse Bundesratka ayaa si gaar ah ugu yeeri kara qof kasta oo ay u arkaan muhiim u ah Switzerland.
2. Baden-Württemberg oo leh xiriir gaar ah
Wasaaradda arrimaha dibadda Switzerland waxay sheegtay in aysan jirin gobol kale oo Jarmal ah oo ay Switzerland la leedahay xiriir dhaqan iyo taariikheed sida Baden-Württemberg. Taasi waxay keentay booqashooyin isdaba joog ah. Tan iyo sanadkii 2000, madaxda dowlad-goboleedyada Jarmalka waxay Bern yimaadeen lix jeer, halka Kretschmann uu keligiis soo booqday afar jeer tan iyo 2011. Marka la barbar dhigo dalal kale sida Austria, Italy ama France, ma jiraan booqashooyin la mid ah.
3. Xiriir siyaasadeed oo dhow
Kretschmann waxaa Bern ku soo dhaweeyay Wasiirka Arrimaha Dibadda Ignazio Cassis iyo Bundesratka Beat Jans, oo mas’uul ka ah cadaaladda iyo amniga. Labada nin waxay leeyihiin aragtiyo siyaasadeed oo isku dhow, waxaana horey u jiray kulan ay hore u yeesheen. Xiriirkooda ayaa ka dhigay booqashada mid sii qoto dheer.
4. Jacaylka Kretschmann ee Switzerland
Inta badan booqashooyinka Kretschmann kuma xirna oo keliya xiriirka Baden-Württemberg iyo Switzerland, balse sidoo kale aragtidiisa gaarka ah ee dalkaas. Wuxuu si cad u sheegay in uu taageere weyn u yahay Switzerland gudaha Midowga Yurub. Wareysi uu siiyay SRF ayuu ku yiri: “Waxaan si weyn u jecelahay Switzerland dhinac walba.”
5. Kretschmann oo xilka ka dagaya
Kadib 15 sano oo uu ahaa wasiir-madaxweyne, Kretschmann wuxuu hadda ka dagayaa xilka. Waxaa beddelaya Cem Özdemir oo ka tirsan xisbiga Cagaaran. Sababtaas awgeed, booqashadiisa Bern waxaa loo arkaa mid macasalaameyn ah, maadaama uu dhawaan mar kale yimid Switzerland. Dowladda federaalka Switzerland waxay sheegtay in kulanka uu ahaa “muujin lagu qadarinayo iskaashiga dhow ee Baden-Württemberg iyo Switzerland sanadaha la soo dhaafay.”
SomaliSwiss Media