Waxaa geeriyootay hoboladdii caanka ahayd Shankaroon Axmed Yuusuf (Sagal), sida ay xaqiijisay Deeqa Maxamed Cali Kaariye. Marxuumadu waxay ka mid ahayd fannaaniintii ugu magaca dheeraa ee soo maray fanka Soomaaliyeed.
Shankaroon waxay ku dhalatay deegaan u dhow Awaare oo la yiraahdo Harodidimo, waxayna ku barbaartay Hargeysa. Waxay fanka bilowday horraantii 1970-meeyadii, kadib markii weriye Mustafe Xaaji Nuur uu dhiirrigeliyey oo uu codkeeda ka helay.
Waxay caan ku noqotay heeso iyo riwaayado ay ka qayb qaadatay, iyadoo ka mid ahayd hobolladii caanka ahaa ee Waaberi. Intii ay fanka ku jirtay, waxay la shaqeysay hal-abuurro waaweyn sida Xasan Qawdhan, Maxamed Aadan Dacar iyo Maxamed Cali Kaariye.
Geerideedu waxay murugo ku reebtay bulshada Soomaaliyeed, iyadoo laga xasuusan doono doorkeedii weynaa ee horumarinta fanka iyo dhaqanka.