Kansarka ganaca (Bauchspeicheldrüsenkrebs) waa mid ka mid ah noocyada kansarka ee ugu halista badan. Hadda, cilmi-baarayaal Maraykan ah ayaa soo bandhigay hab daaweyn cusub oo rajo leh. Arrintan waxa ay ku saabsan tahay:
- Cilmi-baarayaal ka socda Maraykanka ayaa tijaabiyey tallaal mRNA ah oo si gaar ah loogu sameeyo bukaanka qaba kansarka ganaca.
- 16 qof oo ka qayb qaatay daraasadda, 8 ka mid ah ayaa muujiyey jawaab difaac (immun), halka 7 ka mid ahi ay weli noolaayeen ilaa 6 sano ka dib qalliinka.
- Kooxda cilmi-baarista ayaa hadda bilowday daraasad caalami ah oo heerka labaad (Phase II) ah si loo xaqiijiyo natiijooyinkan.
Dalka Switzerland, sanad kasta qiyaastii 1800 qof ayaa laga helaa kansarka ganaca, halka 1500 ay u dhintaan. Taasi waxay ka dhigaysaa mid ka mid ah kansarrada ugu dhimashada badan. Kaliya 15% dadka la ogaado kansarkan ayaa noolaanaya shan sano ka dib.
Ilaa hadda, daaweynta ugu badan waa qalliin ama kiimiko (chemotherapy). Laakiin mustaqbalka, waxaa suuragal ah in lagu daro hab cusub oo ah tallaal.
Shirkii sannadlaha ahaa ee American Association for Cancer Research, cilmi-baarayaal ka socda Memorial Sloan Kettering Cancer Center ayaa soo bandhigay natiijooyin rajo leh oo ku saabsan tallaalkan mRNA. Waxaa la sheegay in bukaanno qaarkood, oo nidaamkooda difaaca uu ka jawaabay tallaalka, ay sannado badan kadib weli caafimaad qabaan.
Mid ka mid ah haweenka daraasadda ku jiray ayaa laga helay kansarka iyadoo 66 jir ah, waxayna qaadatay 9 qiyaas oo tallaal ah. Hadda waa 72 jir, waxayna sheegtay inay si caadi ah u nooshahay oo aysan wax xaddidaad ah qabin — arrintaasna waxay ku tilmaantay “mucjiso”.
Tallaal gaar loo sameeyo qof kasta
Habkan cusub waa tallaal daaweyn ah (therapeutic vaccine), oo aan ka hortag ahayn kansarka, balse ka hortaga inuu sii fido ama soo noqdo. Waxa gaar ka dhigaya waa in tallaalka si gaar ah loogu sameeyo bukaan kasta, iyadoo la adeegsanayo xog hidde-side (genetic material) laga soo qaaday burooyinka kansarka ee laga saaray qalliinka.
Tani waxay ka caawinaysaa jirka inuu barto sida loo aqoonsado kansarka, uguna diyaargaroobo inuu mustaqbalka la dagaallamo. Unugyada difaaca ee sidaas loo “tababaray” waxay noolaan karaan sannado badan, xitaa tobannaan sano, iyagoo ka hortagi kara inuu kansarku dib u soo laabto.
SomaliSwiss Media