Taliyaha cusub ee booliska gobolka Walliser Kantonspolizei, Frédéric Gisler, ayaa ugu dambayn jebiyay aamusnaantii uu isagu is saaray muddo dhowr toddobaad ah kadib musiibadii dabka ee ka dhacday Crans-Montana.
Gisler oo xilka la wareegay 1-da Janaayo ayaa xusay in isla habeenkii uu xilka bilaabay ay dhacday masiibada dabka. Wuxuu sheegay in maalmaha hore uu warbaahinta la hadlay, balse laga bilaabo 10-kii Janaayo—maalintii ka dambeysay maalinta baroordiiqda qaran—uu go’aansaday inuu aamuso si dadka dhibaatadu saameysay fursad loogu siiyo inay nafsiyan uga soo kabtaan.
Wuxuu tilmaamay in dhacdadaasi ay ahayd mid culays nafsiyeed aad u weyn ku reebtay isaga, shaqaalaha booliska, dadka badbaadiyay iyo qoysaska dhibbanayaasha. Booliska oo dhan—gaar ahaan kuwa dembi-baarista iyo gendarmerie—ayaa la ildaran daal iyo cadaadis ka dhashay baaritaanka socda. Wuxuu xitaa is weydiiyay: “Sideen muddo dheer sidan ku sii wadi karnaa?”
Gisler wuxuu qiray in masuuliyadda uu hayo ay tahay mid aad u culus, gaar ahaan marka uu shaqaalaha u diro hawlgallo uu ogyahay inay si fudud u dhaawacmi karaan. Wuxuu sheegay inuu hadda raadinayo taageero dheeraad ah oo nafsi iyo dhaqaale ah si uu u caawiyo shaqaalihiisa, isla markaana uu codsaday in la kordhiyo shaqaalaha.
Wuxuu sidoo kale ka hadlay dhacdo ka dhacday dhegeysi maxkamadeed bishii Febraayo oo la xiriirtay milkiilayaasha goobta uu dabku ka kacay, isagoo sheegay in weerar ay la kulmeen uu ahaa mid aan la aqbali karin, isla markaana tan kadib la adkeeyay habraacyada amniga.
Ugu dambayn, Gisler wuxuu sheegay in inkastoo dhacdadu dhaawacday sumcadda booliska, haddana uu arkay taageero iyo mahadnaq badan oo ay shacabka u muujiyeen booliska, taasoo ku dhiirrigelisay inuu sii xoojiyo kalsoonida dadweynaha si wada noolaanshaha gobolka Valais uu u sii wanaagsanaado.
SomaliSwiss Media