Hay’adda Socdaalka iyo Kastamka Maraykanka (ICE) ayaa xabsiga dhigtay saddex muwaadin oo u dhashay dalka Switzerland, kadib markii la ogaaday in ay ka dheeraadeen muddadii sharci ee ay dalka ku joogi kareen. Mas’uuliyiinta Maraykanka ayaa xaqiijiyay in tallaabadan ay qayb ka tahay adkeynta sii kordheysa ee xeerarka gelitaanka iyo joogitaanka dalka.
Wararka ayaa sheegaya in dadka la xiray ay si sharci ah u galeen Maraykanka, balse ay ku xadgudbeen shuruudaha fiisaha iyagoo ku sugnaa dalka waqti ka badan inta loo oggol yahay. ICE ayaa carrabka ku adkaysay in qof kasta oo jebiya sharciga socdaalka lala xisaabtami doono, iyadoon loo eegin waddanka uu ka yimid.
Dowladda Maraykanka ayaa qorsheyneysa in ay sii adkeyso xeerarka socdaalka, taas oo saameyn ku yeelan karta dalxiisayaasha, ardayda, iyo dadka ku imanaya fiisayaasha shaqada. Khubarada socdaalka ayaa uga digaya dadka safarka ah in ay si dhow ula socdaan muddada fiisahooda si ay uga fogaadaan dhibaatooyin sharci iyo xabsi.
Arrintan ayaa noqotay digniin cad oo ku socota muwaadiniinta caalamka, gaar ahaan kuwa ka imanaya Yurub, in Maraykanku si adag ula dhaqmo jebinta shuruudaha socdaalka.
SomaliSwiss Media